Родная мова — багацце народа
Мова мая —
шум гаёў напрадвесні,
стан дзявочы бяроз,
звонкі спеў салаўя
і матуліны шчырыя песні —
мова мая…
М. Цімінская
Родная мова жыве ў культуры кожнага народа. Традыцыі, звычаі, літаратура, мастацтва і гісторыя асобнай нацыі перадаюцца з пакалення ў пакаленне ад бацькоў да дзяцей з дапамогай мовы. Штогод 21 лютага адзначаецца Міжнародны дзень роднай мовы. Ён устаноўлены ЮНЭСКА з мэтай садзейнічання моўнай і культурнай разнастайнасці і шматмоўю. Разнастайнасць моў з’яўляецца велізарным здабыткам чалавечай спадчыны. Самымі распаўсюджанымі мовамі ў сучасным свеце з’яўляюцца кітайская, англійская, руская, іспанская, арабская, партугальская, французская.
У гэты дзень сусветнай супольнасці нагадваюць, што ўсе мовы прызнаюцца роўнымі, таму што кожная з іх унікальная і кожная ўяўляе жывую спадчыну, да якой мы павінны сур’ёзна ставіцца і аберагаць. Вялікая роля ў захаванні мовы належыць літаратуры і культуры.
Для наведвальнікаў бібліятэкі сямейнага чытання бібліятэкар правяла агляд літаратуры з выставы-прапановы «Адчуем водар мовы роднай» і дала рэкамендацыі да чытання мастацкіх кніг аматарам беларускіх аўтараў.
Нашы малодшыя чытачы заахвоціліся гульнёй-перакладанкай «Смак роднай мовы», таксама выбралі сабе цікавыя кнігі на беларускай мове для вольнага чытання.
Атмасфера прыгажосці і мілагучнасці беларускай мовы прысутнічае ўсюды. Словы ветлівасці “добрай раніцы”, “калі ласка», “дзякуй”, “да пабачэння” людзі кажуць кожны дзень. Карыстайцеся імі і, дзякуючы ім, адчуйце наколькі багатая і непаўторная наша з вамі мова. 
